عندما تريدُ شيئاً ..

هي كان يامكان في قديم الزمان

إجا لعنا ولد صغير من أقاربنا

ومن كلمة لكلمة وأنا عمأحكي معه ، قلتله عطيني عيونك الخضر

قللي لأ ، مافي تاخديهن !

سألته ليش ؟

قللي عيوني أحلى من عيونك :-/

قلتله بعرف ، مشان هيك بدي  ياهن

قللي الحق عليكي ، لو بدك عيون خضر كنتي طلبتي من الله كتير كتير انو يعطيكي عيون خضر وقلتيله أنك بتحبيهن -___-

قلتله انت هيك عملت؟

قللي إيه ! أصلا أنا بحب اللون الأخضر أكتر شي منشان هيك الله  عطاني ياهن -_-

قلتله مااااااااشي يا أبو راس كبير ، مارح طعميك بليلة

…

هلأ بصفنة صغيرة بكلامه ، لاقيت فيه وجهة نظر

أنه فعلا لما بيكون شي خير بحقنا  ومنحبه كتير ، الله بيسره بطريقة أو أخرى

إي ولساتني بحب العيون الخضر

ع الهامش ..

مممممم تعودت كل فترة أكتب شوية فشات خلق ع فيسبوك ، رح اكتبهن هون وعمرو ماحدى يرت

صحي مرحبا ..

رح احكي عن شغلات حابة احكي عنها وبدي فش خلقي شوية ..

عفكرة اسم مدونتي جواب مستفز جدا صار يستخدم كعزاء لكل مصيبة .. دوما الناس مستعدة تقللك مو مشكلة !

مع انو الشغلة بتكون كبيرة ، ورح تحطمك هي اذا ماحطمتك .. بس بيقولو مو مشكلة .. هلأ هالكلمة مستفزة كتير .. بس أنه كمان الناس معهن حق .. مارح يبكو معك ويزودوها عليك .. افهمها بقى يا بني آدم !

يعني .. رسبت بالدراسة .. مو مشكلة

خسرت بتجارتك .. مو مشكلة

حاسس حالك مخنوق .. عادي .. مو مشكلة

حدى دبحلك قلبك .. عادي بتصير .. شبك ولو .. اي بتصير .. وطبعا مو مشكلة !

حدى بهدلك وشرشحك وجردك من كل شعورك بالانسانية .. معلش يا ابني .. هيك الدنيا … مو مشكلة !

انطفت الكهربا .. مو مشكلة .. تعودنا

راح الصبي .. مو مشكلة .. الا مايرجع .. أو ……. يجي غيرو !

اختفاء بني ادم ع غفلة طب غم من حياتك .. عادي .. ولو هيك بدون اسباب او يقلك مع السلامة .. هي بالذات .. عـــــــــــــــــــــادي .. ومو مشكلة !!

في فقر بالدنيا .. اي عادي مو مشكلة .. هيك الدنيا ، بعدين هدول الهن الجنة يوم القيامة  !!

شب لطشني بالشارع .. اي مو مشكلة ولو .. بتصير !

انو نشوف ناس حياتها عمتنهدم بدون أي سبب .. مو مشكلة هيك الدنيا .. لك بس فهموني كيف

أنو تشوف بني آدم بهيم ( ياعيب الشوم منكن) عامللي حالو فهمان ومثقف ومتبني قضية ولاحقلي جماعة المثقفين .. لك أنو جد جد جد .. وحياتو ل الله مو مشكلة .. بس يقعد يتفهمن عليك وهو واثق من حالو .. كمان مو مشكلة !!!!!! كتير هيك

وأكيد بتعرفو الكمالة … خلص ماعاد عنا مشاكل !

لأيمتى ؟ مو مهم .. المهم نضل نبعدعن كل المشاكل بقولنا مو مشكلة .. اي نهرب .. يمكن هيك أريح لراسنا ..

بس أنو مو (مو مشكلة) anymore !!

ليش بحب تويتر ..

تويتر تويتر تويتررررررر

مين مابيعرف هالموقع الضخم .. يللي بينوصف بكلمة وحدة : بيجنن !

تقريبا صرلي سنتين بفوت عليه .. قدملي الكتير وفادني كتير و(مازال)

منبلش بالأسباب يللي خلتني أتعلق بتويتر أكتر من أي موقع تاني :

أولاً: ماحدى بيتغالظ عليي هونيك متل الفيسبوك ، ولا حدى بيفرض حاله عليي ، ببساطة أي حدى مابدي ياه فيني ألغي متابعته بدون أي مجاملة ، بس مابتخيل أعمل هالشي بالفيسبوك مثلاً نظراً لحالات الانطماز المنتشرة هالأيام ، بس لأ لأ ، هالأيام صايرة قلبي قوي وعمبعمل كل شي ع فيسبوك وتويتر ..

يعني من الآخر مابحس حالي مراقبة ولا الكل عميطلع ع حكيي ، بكتب وبمشي شو مابدي وقت مابدي ..

تاني شي : أنو سهل وبسيط وبيلائم مزاجيتي ، يعني فيني أحكي بأي موضوع بأي وقت .. طبعاً هو بيئة مثالية للنق والنق والنق وبما أنو أنا بحب النق منشان هيك بحب تويتر كتير ، كتير شغلات بحب أحكيها بس مابلاقي غير تويتر في وشي ، يعييييييييش تويتر أحلى نق وأحلى نقاقين

تالت شي : الناس يللي بعرفهن على تويتر ، الهن غير نكهة .. إيه غير غير هنن .. وأحلى شي أنو مامنعرف بعض بس منتواصل عبر تويتر .. عن جد متعة وعنجد فرصة سعيدة لكل انسان حباب بعرفو ع تويتر

رابع شي : تويتر هو منفسي الأكبر ، يعني مو أهلي ولا رفقاتي ولا شي .. لأ لأ لأ ، تويتر وبسسسسسسسسس ، وياما بتجيني حالات هسترة مابعرف شو بحكي فيها ، بس ع تويتر مابحس حالي مقيدة .. خلص أنا متل ما أنااااااا ، وياما عدت عليي أيام كان تويتر هو صديقي الوحيد بهالدنيا 

خامس شي : استغنيت عن متابعة الأخبار بوجودو ، الحمد لله ياربي ، لأنو بتابع الأخبار يللي بدي ياها وبرتاح من صوات قناة الوصال والجزيرة يللي مابيهدو ببيتنااااااااا صرلي قرون ماشفت التلفزيون بس طبعا مابستغني عن صواتوووو يللي بتنزعلي صباحي ومسايي -___-

سادس شي : النقاشات السريعة يللي بتصير على تويتر إلها غير نكهة وغير طعمة ، لأنو مابتناقش غير مع ناس بحسهن بيفهمو عليي ، وكمان تحية تانية لجماعة تويتر الرايقين الحلوين

سابع شي : الحرية والسرررررررعة  .. عالم تويتر بسيط وحلو وممتع .. هونيك فيني كون أنا بلا مجاملات وبلا سوء فهم … وفيني وبمعتة أني تابع يوميات الناس هونيك وشوف تويتاتهن بسرعة .. كتير بحب أقرأ يوميات الناس بتويتر لأنو مووووووو مملة ، أنو المختصر المفيد ، حتى الحسابات اللي مو شخصية بتعطيني الزبدة بأي مجال مهتمة فيه .. أخبار .. طبخ .. مشاهير .. تعليم إلخ إلخ

منشان هيك .. الحمد لله على نعمة تويتر .. وتحية للشعب التويترجي العظيم

هيك أو هيك ؟؟ لأ لأ !! طلعت هيك ؟!

أول شي وقبل كل شي .. الرحمة لشهداء سوريا … أول شي وآخر شي .. وفوق كل كلام … الفاتحة على أرواحهم ..

تاني شي .. ياجماعة أنا رح طق وأنفجر من هالوضع يللي صاير .. كتير هيك .. بلدنا بتستاهل أحسن من الشي يللي عميصير

وأهل بلدنا ناس طيبين ، بيستاهلو نعيش كلنا سوا أحلى عيشة ..

أنا بكره السياسة ، وبكره آخد وأعطي فيها ، لكن بعد يللي صار تكون إلي رأيي الخاص ، يللي متأكدة أنو ماحدا رح يحترمه

إيه .. صار الوضع كما يلي .. كل واحد ماسك رأيو ومو مستعد يسمع التاني .. وللأسف لما حدا بيختلف مع حدا ممكن تصير خناقة ويشتغل السب ..

الوضع صعب كتير ، ولنطلع منو لازم الكل يتصرف بحكمة ويبعد مشاعرو شوية ويتصرف بعقل وروية ..

قبل ما قول آخر شغلة ، من قلبي بتمنى الله يحميلنا سوريا وأهل سوريا وكل شي بسوريا لأنو بتعرفو شو هي سوريا ؟

هي أحلى شي بالدنيا !

منرجع لشغلتي .. بتعرفو هي النكتة يللي بتقول ، أجو ناس بسيارة وقفوه لواحد قالولو ، ولا إنت معنا ولا معهن ؟ قاللهم : معكن سيدي ، قلو الرجال اي نحنا هنن !!

ويللي صاير هلأ .. مع أو ضد ، وماعاد حدا تقبل رأي التاني ، حقهم ، الحقيقة كتير مغبّشة وعليها Blur

عسيرة مع أو ضد ، مبارح شفت كابوس أنو أنا صرت مع فريق السنافر الزرق ، والسنافر الحمر عميطاردونا !!!

وهالصورة بتوضح شوية نتائج من المع أو الضدّ

مابعرف ، شوية خيالات وشغلات !!

اليوم : ….

المكان : الصف ..

المادة : كل شي ، إيه رح ناخد من كل شي اليوم ، معلش مشان نكسر الروتين ، كمان أنا مليت وطلابي ملو أكتر مني ، طلابي يللي كل يوم بياخدو 8 حصص دراسية بين عربي وإنكليزي وغير مواد ، بتوقع أنا بهالعمر مابتحمل هيك عدد هائل ، لكن هالجيل ذكي جداً وقدراته العقلية فائقة ..إي منرجع لموضوعنا !

قصة .. منبدأ .. وبالعاميّة كالعادة …

أنا بدخل عالصف ، مرضانة ، وراسي ماعميوقف وجعه ، لكن كعادتي ، طناش ، إيه أنا بتجاهل كل الألم والنق

Good Morning Children

…. Good morning miss

How are you ?

Fine thank you !

كلما بيقولولي هالجملة النمطية هي ، بشعر بغصّة ، ليه لحتى كل يوم يكونو مناح ويكذبو ، على فرض ماكانو مناح فعلاً ،، أنا بدي الصدق ، بعدين بقول اسكتي يابنت ماتفتحي عليكي باب جديد للنق ، مو نااااااقصك !