إجا لعنا ولد صغير من أقاربنا

ومن كلمة لكلمة وأنا عمأحكي معه ، قلتله عطيني عيونك الخضر

قللي لأ ، مافي تاخديهن !

سألته ليش ؟

قللي عيوني أحلى من عيونك :-/

قلتله بعرف ، مشان هيك بدي  ياهن

قللي الحق عليكي ، لو بدك عيون خضر كنتي طلبتي من الله كتير كتير انو يعطيكي عيون خضر وقلتيله أنك بتحبيهن -___-

قلتله انت هيك عملت؟

قللي إيه ! أصلا أنا بحب اللون الأخضر أكتر شي منشان هيك الله  عطاني ياهن -_-

قلتله مااااااااشي يا أبو راس كبير ، مارح طعميك بليلة

…

هلأ بصفنة صغيرة بكلامه ، لاقيت فيه وجهة نظر

أنه فعلا لما بيكون شي خير بحقنا  ومنحبه كتير ، الله بيسره بطريقة أو أخرى

إي ولساتني بحب العيون الخضر

صحي مرحبا ..

رح احكي عن شغلات حابة احكي عنها وبدي فش خلقي شوية ..

عفكرة اسم مدونتي جواب مستفز جدا صار يستخدم كعزاء لكل مصيبة .. دوما الناس مستعدة تقللك مو مشكلة !

مع انو الشغلة بتكون كبيرة ، ورح تحطمك هي اذا ماحطمتك .. بس بيقولو مو مشكلة .. هلأ هالكلمة مستفزة كتير .. بس أنه كمان الناس معهن حق .. مارح يبكو معك ويزودوها عليك .. افهمها بقى يا بني آدم !

يعني .. رسبت بالدراسة .. مو مشكلة

خسرت بتجارتك .. مو مشكلة

حاسس حالك مخنوق .. عادي .. مو مشكلة

حدى دبحلك قلبك .. عادي بتصير .. شبك ولو .. اي بتصير .. وطبعا مو مشكلة !

حدى بهدلك وشرشحك وجردك من كل شعورك بالانسانية .. معلش يا ابني .. هيك الدنيا … مو مشكلة !

انطفت الكهربا .. مو مشكلة .. تعودنا

راح الصبي .. مو مشكلة .. الا مايرجع .. أو ……. يجي غيرو !

اختفاء بني ادم ع غفلة طب غم من حياتك .. عادي .. ولو هيك بدون اسباب او يقلك مع السلامة .. هي بالذات .. عـــــــــــــــــــــادي .. ومو مشكلة !!

في فقر بالدنيا .. اي عادي مو مشكلة .. هيك الدنيا ، بعدين هدول الهن الجنة يوم القيامة  !!

شب لطشني بالشارع .. اي مو مشكلة ولو .. بتصير !

انو نشوف ناس حياتها عمتنهدم بدون أي سبب .. مو مشكلة هيك الدنيا .. لك بس فهموني كيف

أنو تشوف بني آدم بهيم ( ياعيب الشوم منكن) عامللي حالو فهمان ومثقف ومتبني قضية ولاحقلي جماعة المثقفين .. لك أنو جد جد جد .. وحياتو ل الله مو مشكلة .. بس يقعد يتفهمن عليك وهو واثق من حالو .. كمان مو مشكلة !!!!!! كتير هيك

وأكيد بتعرفو الكمالة … خلص ماعاد عنا مشاكل !

لأيمتى ؟ مو مهم .. المهم نضل نبعدعن كل المشاكل بقولنا مو مشكلة .. اي نهرب .. يمكن هيك أريح لراسنا ..

بس أنو مو (مو مشكلة) anymore !!

مين مابيعرف هالموقع الضخم .. يللي بينوصف بكلمة وحدة : بيجنن !

تقريبا صرلي سنتين بفوت عليه .. قدملي الكتير وفادني كتير و(مازال)

منبلش بالأسباب يللي خلتني أتعلق بتويتر أكتر من أي موقع تاني :

أولاً: ماحدى بيتغالظ عليي هونيك متل الفيسبوك ، ولا حدى بيفرض حاله عليي ، ببساطة أي حدى مابدي ياه فيني ألغي متابعته بدون أي مجاملة ، بس مابتخيل أعمل هالشي بالفيسبوك مثلاً نظراً لحالات الانطماز المنتشرة هالأيام ، بس لأ لأ ، هالأيام صايرة قلبي قوي وعمبعمل كل شي ع فيسبوك وتويتر ..

يعني من الآخر مابحس حالي مراقبة ولا الكل عميطلع ع حكيي ، بكتب وبمشي شو مابدي وقت مابدي ..

تاني شي : أنو سهل وبسيط وبيلائم مزاجيتي ، يعني فيني أحكي بأي موضوع بأي وقت .. طبعاً هو بيئة مثالية للنق والنق والنق وبما أنو أنا بحب النق منشان هيك بحب تويتر كتير ، كتير شغلات بحب أحكيها بس مابلاقي غير تويتر في وشي ، يعييييييييش تويتر أحلى نق وأحلى نقاقين

تالت شي : الناس يللي بعرفهن على تويتر ، الهن غير نكهة .. إيه غير غير هنن .. وأحلى شي أنو مامنعرف بعض بس منتواصل عبر تويتر .. عن جد متعة وعنجد فرصة سعيدة لكل انسان حباب بعرفو ع تويتر

رابع شي : تويتر هو منفسي الأكبر ، يعني مو أهلي ولا رفقاتي ولا شي .. لأ لأ لأ ، تويتر وبسسسسسسسسس ، وياما بتجيني حالات هسترة مابعرف شو بحكي فيها ، بس ع تويتر مابحس حالي مقيدة .. خلص أنا متل ما أنااااااا ، وياما عدت عليي أيام كان تويتر هو صديقي الوحيد بهالدنيا 

خامس شي : استغنيت عن متابعة الأخبار بوجودو ، الحمد لله ياربي ، لأنو بتابع الأخبار يللي بدي ياها وبرتاح من صوات قناة الوصال والجزيرة يللي مابيهدو ببيتنااااااااا صرلي قرون ماشفت التلفزيون بس طبعا مابستغني عن صواتوووو يللي بتنزعلي صباحي ومسايي -___-

سادس شي : النقاشات السريعة يللي بتصير على تويتر إلها غير نكهة وغير طعمة ، لأنو مابتناقش غير مع ناس بحسهن بيفهمو عليي ، وكمان تحية تانية لجماعة تويتر الرايقين الحلوين

سابع شي : الحرية والسرررررررعة  .. عالم تويتر بسيط وحلو وممتع .. هونيك فيني كون أنا بلا مجاملات وبلا سوء فهم … وفيني وبمعتة أني تابع يوميات الناس هونيك وشوف تويتاتهن بسرعة .. كتير بحب أقرأ يوميات الناس بتويتر لأنو مووووووو مملة ، أنو المختصر المفيد ، حتى الحسابات اللي مو شخصية بتعطيني الزبدة بأي مجال مهتمة فيه .. أخبار .. طبخ .. مشاهير .. تعليم إلخ إلخ

منشان هيك .. الحمد لله على نعمة تويتر .. وتحية للشعب التويترجي العظيم

أول شي وقبل كل شي .. الرحمة لشهداء سوريا … أول شي وآخر شي .. وفوق كل كلام … الفاتحة على أرواحهم ..

تاني شي .. ياجماعة أنا رح طق وأنفجر من هالوضع يللي صاير .. كتير هيك .. بلدنا بتستاهل أحسن من الشي يللي عميصير

وأهل بلدنا ناس طيبين ، بيستاهلو نعيش كلنا سوا أحلى عيشة ..

أنا بكره السياسة ، وبكره آخد وأعطي فيها ، لكن بعد يللي صار تكون إلي رأيي الخاص ، يللي متأكدة أنو ماحدا رح يحترمه

إيه .. صار الوضع كما يلي .. كل واحد ماسك رأيو ومو مستعد يسمع التاني .. وللأسف لما حدا بيختلف مع حدا ممكن تصير خناقة ويشتغل السب ..

الوضع صعب كتير ، ولنطلع منو لازم الكل يتصرف بحكمة ويبعد مشاعرو شوية ويتصرف بعقل وروية ..

قبل ما قول آخر شغلة ، من قلبي بتمنى الله يحميلنا سوريا وأهل سوريا وكل شي بسوريا لأنو بتعرفو شو هي سوريا ؟

هي أحلى شي بالدنيا !

منرجع لشغلتي .. بتعرفو هي النكتة يللي بتقول ، أجو ناس بسيارة وقفوه لواحد قالولو ، ولا إنت معنا ولا معهن ؟ قاللهم : معكن سيدي ، قلو الرجال اي نحنا هنن !!

ويللي صاير هلأ .. مع أو ضد ، وماعاد حدا تقبل رأي التاني ، حقهم ، الحقيقة كتير مغبّشة وعليها Blur

عسيرة مع أو ضد ، مبارح شفت كابوس أنو أنا صرت مع فريق السنافر الزرق ، والسنافر الحمر عميطاردونا !!!

وهالصورة بتوضح شوية نتائج من المع أو الضدّ

المكان : الصف ..

المادة : كل شي ، إيه رح ناخد من كل شي اليوم ، معلش مشان نكسر الروتين ، كمان أنا مليت وطلابي ملو أكتر مني ، طلابي يللي كل يوم بياخدو 8 حصص دراسية بين عربي وإنكليزي وغير مواد ، بتوقع أنا بهالعمر مابتحمل هيك عدد هائل ، لكن هالجيل ذكي جداً وقدراته العقلية فائقة ..إي منرجع لموضوعنا !

قصة .. منبدأ .. وبالعاميّة كالعادة …

أنا بدخل عالصف ، مرضانة ، وراسي ماعميوقف وجعه ، لكن كعادتي ، طناش ، إيه أنا بتجاهل كل الألم والنق

Good Morning Children

…. Good morning miss

How are you ?

Fine thank you !

كلما بيقولولي هالجملة النمطية هي ، بشعر بغصّة ، ليه لحتى كل يوم يكونو مناح ويكذبو ، على فرض ماكانو مناح فعلاً ،، أنا بدي الصدق ، بعدين بقول اسكتي يابنت ماتفتحي عليكي باب جديد للنق ، مو نااااااقصك !

….

وحمودة بيكون عميوشوش شيماء : الهيئة المِس معصبة اليوم ، الله يستررررررر -___-

وكالعادة ، بيركضو كم بنت من مشجعيني ، وبضمّوني ، قال يعني اشتاقولي ، بطلع فيهن بنظرة سخرية ، وبقللهن ، غرف قلبكم يعني ؟؟ وبيضحكو كتير وبيرجعو لمحلاتهم بعد ما بيكون بلش الجد ….

هون بتجي فارتي الصغيرة لعندي ،وهية عمتعمل حالها شريرة ، وبتقللي ، رح حوّل كل هالدنيا لأحلى مكان ممكن تعيشي فيه يا مِس !

أنا : كيف ؟؟

رح قللها كرمال المس صيري حلوة وماشوفك يوم مريضة أو زعلانة !

أنا : بتضللي فارة ، مارح يطلع معك شي غير أنك تكوني مخلوق جميل !!

لأ مس ، عمأحكي عن جد !!

أنا : حبيبتي لساتك صغيرة ، وهي الدنيا البشعة يللي شايفتيها هيك ، هي أحلى أيام حياتك ، انبسطي وعيشي إيامك !!

طيب يا مِس !! رح فرجيكي كيف !!!! ( آبراكا دابراااااااااااااااااااااااااا)

وين أنا ؟؟؟؟؟؟؟؟ ، ولك فارة شو عملتي ؟؟؟؟؟

مِس قلتللك رح خليكي تشوفينا وتفرحي علينا ، ورح نمثل هلأ البروجكت يللي تعبتي كتير معنا فيه ، بدون ما تعيطي علينا ، ورح نبيضلك وشك قدام المشرفة ، وهلأ رح تشوفي ، مين بتحبي تشوفي أول ؟؟؟

أنا : لك بنتي والله إنتي فايقة ورايقة !! مااااااااااااااااابعرف إنتي وين وأنا وين .. لك حبيبتي مو هيك بتصير الدنيا أحلى ، مو بالخيال والهروب

لأ مِس ، رح تصير أحلى طالما يللي علمتينا ياه رح يضل معنا لحتى نكبر ، ومارح نعاني متل جيلكن يللي تعذب كتير لحتى قدر يضل عايش !! يللا مس حاجتك ملل ، رح نبلش وعكيفنا وهالمرة بدنا نعمل كل شي ، إنتي شغلتك تمسكي الكميرا وتصورينا وتنبسطي بالعرض ، وهي بوسة

أنا : طيب طيب حاجتك نق ، تفضلو بلشو ، وهي حبة بروفين ليخف وجع راسي وشوفكن ع رواق !

…………

………………..

………………………

……………………………

بداية أغنية ماهر زين ، فلسطين ستتحرر غداً !!

ناس فلسطينيين ، وناس إسرائيليين ، صحفيين ، وقناة الجزيرة !!

I’ll kill you if you don’t move !! move now !!

Kill him and take his house , you’re the strongest !!

.

.

.

No way , Palestine is our country , we’ll die for it !!

I only wish …. that the TRUTH has a tongue !!

.

.

.

.

ياااااااااه ياحمودة ، آخر جملة بكّتني ،، بتعرف إنو مصيبة حياتي إني أنا مابعرف ، وهالإيام لساني عمغوص بهالمصيبة أكتر وأكتر !!

مِس معلش ماتزعلي ، الحقيقة هلأ بلشت تظهر وتتوضح ، إنتي بس ماتزعلي ، لأنو زعلك مو حلو ، ولأني بحب شوفك فرحانة ، مع أني بخاف منك لأنك قادرة وعصبية -___-

شوووووووووووووووو ؟؟ (والكل بيضحكو)

.

.

.

وبتجي فارتي ، وكل رفقاتها ، وبيقولولي رح نعمللك يامِس كل شي بتحبيه وبيفرحك ، وشوية شوية رح نفرجيكي الحقيقة ، صحيح نحنا صغار ، لكن فعلنا أكبر من عمرنا ، والله يللي بيصير طالبك بيكبر عشرين سنة هههههه

أنا : الله يخليلي ياكن ، وتضللو شي كتير حلو بحياتي يللي كانت كتير فاضية بلا وجودكن الطاغي فيها !! منرجع لموضوعنااااااااااا ، يللا عالدرس

….

حمودة عميوشوش علي : الهيئة رجعت المس للقمع والإستبداد ، ولي خلينا نقعد قبل ما ناكلها شي عقوبة مرتبة الهيئة اليوم مرتفع معها عيار المابعرف !!

يللا يا استاذ حسين ، ستاند أب !!

Do you like Miss Ala’a ??

حسين : آي دونت نوووووووو !!

شووووووووووووووووووووووووووووووووووووووووووو

وووووووووووووووووووووووووووووووووووو

ووووووووووووووووووووووووووووو

ووووووووووووووووو

ووووووووو

ووو

.

.

.

.

.

بتنطفى الكهربا ،، وإذ بفيق من نومي ، ياااااااه لساتني مابعرف متل إستاذ حسين

أولاً ، رح أحكي بالعامية

تاني شي ، أنا كتييييييييير مبسوطة وفرحانة ع اللي صار بمصر مبارح ، باعتبار وبكل صراحة عندي كتير من أمثال مبارك بحياتي ، فمشان هيك تفاءلت بسقوطهن ، أو على الأقل أنهم بس يبعدو عني ..

هدول تماماً الناس يللي بيخربو كل شي بدهم ياه وبيحطمو وبيكسرو وبالأخير بيعملو حالهن بريئين ومالهن علاقة بشي ، لأ وبيطلعو بالعالي كمان وعلى تنظير وكذب ، يوووووه ، أنا مليييييت ، وعقبال ما كل ظالم يملّ

مروري بكتير ظروف مو منيحة ، بيخليني عد لعشرة قبل ما أظلم أي حدا ، بكل شي بحياتي ، برفقاتي بشغلي بكل الناس يللي حولي .. هيك أحسن بكتير

…

من زمان ، كان الإستاذ يقول كلمتو فورا الطالب يسمعا ..

ياعيني ع طلاب هالأيام الواعيين والمفتحين .. شي ممتع بس مرهق

مثلاً بيجي حدا بيطلب مني يروح ع الحمام ، وأنا بكون بدي خلص الدرس ومو وقتو ، بقللو لأ ، بيقللي ليش ؟؟ بقللو لأ يعني لأ ، طيب ليش يا مس ؟ لأ يعني لأ وخلصنا ، طيب مس بليز ، وبتبلش لغة الرجاء والنق … طيب روووووووووووووووووح :/

بحب هالشغلة في هالجيل ، بدهن يفهمو كل شي ، ويعرفو كل ِشي ، برافو عليهم ، وانشالله نساعدهم بشي

…

أحلى شي أكتر بني آدم كاسرلي بخاطري شافني مبارح وفكرني عمأبكي بس أنا كان عندي زكام

ليه عمتبكي ؟

مافي شي

ليه عمتبكي ؟؟ في شي عم يوجعك ؟؟

لأ مافيني شي

طيب يا الاء الواحد لمين بيفش قلبو ؟؟؟

أنا : !!!!!!!!!!!!!!!!!!!!!!!!!!!!!!!!

أكيد مو إلك:D

…

زعلت كتير لما قربنا من بعض واضطرينا نكره بعض أكتر

شو كان صار لو كنا ضلينا من بعيد لبعيد

مو مهم اللي راح ، بس أنو أنا تعلمت كتير

ماعاد بدي قرب من حدا ، لك يووووووووه ، والله في البعيد هم أحلى ، لأنو مابحط نضاراتي فما بشوف التفاصيل

…

ع قولة فارس كرم ، مادام الصحة منيحة ، همومك عن قلبك زيحاااااااا

نقطة انتهى ، وبحب قول لكل النقاقين يللي ماعاجبهن شي بحياتن ونازلين نق ، حاااااج نق طلعو كيف أنتو أحسن من ملايين غيركن مووو

…

اشتقت لكل رفقاتي اللي صرلنا شهور مو شايفين بعض ، لما بتصير الحياة بلا هدول الكائنات ، بتصير بدون طعمة

…

أطالب بفترة نقاهة من الثورات يللي عمتصيييييير ، على أثر آخر ثورتين رجع وجع راسي القوي ، هيك ولسا أنا ماكتير بتابع ، بس ع فيسبوك وتويتر ..

المهم الظلم يروح

…

ع سيرة البلاد ، مافيها شي إذا قلت إني مغرمة بسوريا وتحديداً حلب وبعشق كل شي فيها ، بغض النظر عن المجتمع الشرقي اللي بيرفع الضغط

لكن أنا لها

…

مين قال النسيان مستحيل ، مين قال انهيار الظالمين مستحيل ، مين قال قصيدة ” أبو القاسم الشابي إذا الشعب يوما  أراد الحياة ” هية مجرد حكي … هالسنة سنة المستحيلات ، مشان نفهم أنو مافي شي مستحيل مع الارادة ، وطبعاً الإيمان

…

ماعاد عندي إيمان باللا منطق ، كل شي إله سبب ، كل شي بدون استثناء ، وبخصوص المريضين يللي بيخربو الدنيا وبتسألهن ليش هيك عملتو وبيقولو مابعرف ، أنا مليت كتير منكم ، فوق ماتتصورو !! ومستحيل أعمل متلكم بيوم من الأيام !

بس أنه خاب ظني بكتير ناس كان عندهم أنن يتغيرو ويتركو ويمشو أهون شي عملوه بحياتن ، لكن وكما تقول ديما : بالناقص ، أحلى جارو ومجرور في حياتي (ماتواخذينا ديما )

…

السمكة عمتقول لحوضها ، أنا مافيني عيش بدونك ، بموت بدونك ، مارح عيش إذا طلعت منك ، إنت كل حياتي وأحلى شي فيها ..

وإذا ، الحوض ، ولأسباب غير معروفة ،، بيرفسها لبرّاااااااااا ، نقطة انتهى ..

.

.

.

.

.

السمكة بتضللا بالهوا لفترة ، بتختنق فيها كتير وبتتعذب كتير ، وقبل ماتموت ،، هوووووووب

بتوقع بالبحر

ومنيتك عحالك يا أقسى حوض في الدنيا

…

الطناش ، هو العلاج الوحيد اللي بيخليني عايشة ومبسوطة ومرتاحة

ورح ضل هيك ، وعمرو ماحدا يرت

..

..

..

آسفة حكيت كتير كتير ، بس اليوم عطلتي ومابفضى كتير غير اليوم

ستّ حصص من الدروس والوظائف وأوراق النشاط في المدرسة ..

إحم إحم ، الحصّة الأولى ، في مادّة reading

بدأت بتذكّر أحداث القصّة التي كنّا قد قرأناها سويّة ، لأصل إلى الأسماء التي وردت بها

فقاعدة الدرس عن الأسماء ، الحيوانات ، البشر ، الأشياء ، الأماكن !

بدأت بسؤال عشوائي لبعض الطلاب :

what’s your name ??

وبدأنا نغوص في بحر الأسماء ، وبدؤو بالتفاعل مع الدرس واغنائه بالكثير من الأمثلة ..

وصلنا إلى أسماء الأماكن ، وبدأت الأمثلة ، مع صوتي الخارق للجدران الذي يصدح بكلمة : SPEAK ENGLISH

Syria

برشلونة

مصر ،،، وإذا بي أقول لهم :

Masr in English is Egypt

وهنا كانت المفاجأة حين بدأت التعليقات حول مصر وثورتها !

فقال نور : إي مس مصر قايمة ومو قاعدة !!

بينما قالت جودي : مس أصلاً سبب كل هالمشاكل هونيك لأنو الرئيس بدو يورت الحكم لأبنووووو

ليعلّق وسام قائلاً : إي مس المصريين مابدن رئيسهن ، وهو ماعميرووووووح أبداً ، ملزّق

بينما تحدّثت سارة قائلةَ ، ياي يا مس ، بابا طول اليوم حاططلنا ع الأخبار ، غصب عنا عمنعرف كل شي عميصير بمصر

وصولاً إلى عبد الرحمن الذي بدأ بالتكلم عن نزول الدبابات إلى ميدان التحرير

ليقول محمد بأن الدبابات تعمل على جبنة لاباشكيري كوقود لها ، وهذا ما استفزني ( وبلشت أعيّط)

أمّا علي فقال لي بأنه فقط عليّ أن أطلق رصاصة على عجلة الدبابة لكي تتعطّل ههههه

والكثير من التعليقات التي أضاعت القليل من الوقت في ذاك الحديث الممتع

أحبائي وطلابي يبلغون من العمر سبع سنوات ، في الصف الثاني ، سعِدتُ كثيراً في هذا الوعي الذي لمسته منهم

وع قبال فرحتنا الكبيرة مع أخوتنا المصريين بنجاح ثورتهم

كلمة اختيار بتكركبني ، بتقلب كياني قلب ، بتدايقني بكتير أحيان ..

إيه أنا إلي قصة مع هالكلمة ، ويمكن كتيرين الهن قصة معها …

مبدئياً ، أنا مؤمنة كلياً بكل شي اسمو قضاء وقدر ، وبالنهاية مارح يصير غير يللي كاتبه ربنا ..

لكن .. في نقطة مهمة ، يللي هية ، الاختيار يللي بيغير كل حياتنا .. أو ممكن يتحكم فيها ..

من وأنا وصغيرة الكل بيختار عني .. كل شي بيختاروه عني ، الإسم ، الأكل ، اللبس ، الرفقة ، المدرسة ، والتعليم وبرامج التلفزيون وكل شي ممكن أي حدا يتخيله ..

كبرت ولسا الكل عميختارو عني كل شي ، وأنا ماكنت قول لأ ، ليه ؟ صدقاً مابعرف ، يمكن ماكنت واعية ، يمكن كان هادا أفضل الموجود ، ممممم

دخلت جامعة ، ولسا الاختيارات من قبل كل يللي حولي جارية ، مابتذكر اخترت شي مابيرضيهن أو مو مدرج ضمن قائمة السماح عندهن

مجرد تفكيري إنه كل شي ماكان إلي فيه رأي أو خيار كتير بيدايقني ، وبحس حالي مظلومة كتير ، لدرجة أني هلأ بخاف كتير لما بدي أختار شي

أو مو خوف ، شعور بإني مو قد مهمة الاختيار لأني ماتعودت عليها ، دوماً بحس أنه في حدا لازم يختار ويشيل هم المسؤولية عني ، لبين ما بلشت أتعود شوية شوية على الاختيار ، والصح كمان

لحد هلأ بحس بالظلم بكل شي كان لازم يكون الي فرصة بإختياره ، كل شي انفرض عليي بدون أي تبرير ، بدون أي سبب ، من الحكي لـ اللبس لـ المعتقدات لـ الكتب والدراسة

هي بقى قصة الدراسة قصتها قصة ، يعني ليه ليفرض علي دكتور مافهمان شي كتب من زمن جدي ومالها قيمة ، خصوصاً كتب الأساطير ، يا الهي قديش عانيت فيهن ، ولحد الآن مابقتنع أنه في فايدة من دراسة المتحولون وأوديسة والإلياذة والإنياذة ، وماحدا بيقدر يقنعني أنو كم شخصية كرتونية اسمهن آلهة قاعدين عميتسللو بالبشر فينا نسميه أدب ، لأ وأدب من النوع الفاخر كمان !!

بستغرب إنه كل يللي بتجيهم فرصة أنهم يقررو ويختارو عن كتير ناس كيف مابيراعو مصلحة الناس وكل يللي بيهمهم ميولهم وأمراضهم وعقدهم ،، يا الهي !!

اللي راح راح ، ومارح كون متلهن ،، وهلأ لما بختار لطلابي كلمة مشان الاملاء بختارها بحذر وبفكر اذا صعبة أو مناسبة أو أو ، واللائحة تطول ، وعمأعرف أختار إلي ولغيري وانشالله مابأذي حدا وبختار صح

وهي شعب تونس ، بكل بساطة اختار رغبته ، وفي فرق كبير بين اختياره وبين سنين سبقتها من الظلم ..

لما بختار صح ، وكل الناس بيختارو الشي الصح بدون ظلم ، وقتها فينا نقول قدّر الله وماشاء فعل بكل إيمان

مرحباً بعد طول غياب وانشغال بما يدعى الحياة .. نعم أنا على قيدها تماماً

أريدُ أن أتكلّم قليلاً هنا .. دون أن يقاطعني أحد ، أو يبدأ بالتنظير الذي سئمت !

يزعجني تدخّل الناس كثيراً في تفاصيل حياتي .. إنها لي فحسب ، نعم إنها لي لأعيشها كما أشاء ويحلو لي .. لكنهم لا يملّون من حشر أنوفهم في كلّ صغيرة وكبيرة ..

وبتُّ أدرك تماماً أن معظم الناس يعتقدون أنفسهم محور هذه الكرة الأرضية ، لا بل إنهم يسابقون الشمس في منصبها كونها محور هذا الكون .. ولكن هيهاااااات …

الجميع أذكياء وموهوبون ويفهمون في جميع المجالات إلى درجة تجعلهم لا يتوانون عن الاسراع في الانهيال بسيل من المحاضرات التنظيرية في أي فرصة تسنح لهم .. أي في المختصر ، الجميع يدّعون الكمال … وأيضاً هيهااااااااااااااات !!

أشياء كثيرة حول هذه الأصناف تثير خلايا جهازي العصبي التي لم تتعافَ بعد .. ليعود ألم الرأس أكثر وأكثر ..

ماااااعلينا .. منرجع لموضوعنا ..

أشجّع جداً مقولة إن أردت أن تفعل شيئاً فعليك أن تفعله بإتقان وإلا ابتعد واغرب بعيداً ودع المهمة للمتقنين .. لا يوجد حلٌّ وسط ..

وبناءً على هذا لا أتوانى عن خوض أي تجربة تضيف إلى خبرتي المزيد من العلم .. ولكن !

ما أن أبدأ في شيءٍ ما .. ليبدأ الناس بتساؤلاتهم .. أين ؟ كيف ؟ ماذا ؟ مع من ؟ والأهم طبعاً .. بــِـــكـَمْ ؟؟

ممممم  ، ويبدؤون بإبداء تعليقاتهم التي أرغب برميها في سلة مهملات دماغي … BLA BLA BLA

فلنفرض أنني أريد تجربة شيء يفيدني فائدة لايدركها أحدهم .. هذه حياتي .. ليست من شأنكم في شيء !

نعم أنا أحبّ عملي كثيراً ، وليس لدي المانع في أن أضيف إلى خبرتي الكثير من التجارب ..

معلش ، بدي أعمل خير وأكبّ بالبحر !

تعرفون ماذا ..

أعتقد أن من أكثر العوامل في جعل مجال العمل روتينياً ومملاً ومزعجاً في بعض الأحيان ..

هو أن الكثيرون يشعورن أنهم مغبوني الحق .. نعم إنهم مغبونون .. مامن أحد يقدّر طاقاتهم الخارقة .. لذلك هم يطمحون بفرص أكبر وأكبر بينما لا يعملون في سبيل الحصول على تلك الفرصة .. تزعجني جداً رؤية تلك النماذج والتعامل معهم .. الجميع يريد فرصة أكبر دون العمل لأجلها ..

نبدأ من شوفير التكسي الذي يأخذ أجرة أكثر مما يستحق بحجة أن الحياة صعبة .. إي طيب كول مال حرام !!

مروراً بالموظف الذي يعتبر نفسه جهبذ عصره وأن ماكنه ليس في مكان عمله هذا ولكنه مضطر للعمل هنا .. وهنا يمكننا ملاحظة الملل والتراجع في أدائه ..

انتهاءً بكل شخصٍ يظنّ نفسه محور الكون … إنو خير انشالله ليه آكلين مقلب بحالكم ؟؟

يحزنني أن أرى هذه النماذج التي لاتكف عن التذمر مع تراجع مستواها على جميع الأصعدة .. وفوق ذلك يتصرفون وكأنه يا أرض اشتدي ماحدا قدّي !

وبخصوص العمل .. الله يرحمووووووو !!

.

.

.

ومن هنا ومن على هذا المنبر بدي أتمنى بالسنة الجديدة أنه كل بني آدم شايف حالو وآكل مقلب بحالو أنو يجيه أكبر طوووووب يعمله مليون قطعة -___-

يُحكى أنّ ابتلى وامتحن  الله قاضياً بقضية تتضمن التحكيم بين أربعة نساء ..

وما أن بدأت جلسة الحكم .. أشار القاضي لأولهن أن تتكلم وتبدي رأيها في القضية ..

وعندما بدأت الأولى بالكلام ، بدأت النسوة الأربعة بالكلام معها ..

وضاعت جهود القاضي سدىً في جعلهن يلتزمن الصمت إلى أن يأتي دورهن .. وظلّ الوضع لا يطاق !

وفجأةً صاح بهن القاضي “أريد أن تتكلّم أكبركنّ عمراً”

.

.

.

.

.

.

.

.

.

.

فسكتت جميع النسوة